z_dyht

каханьне - гэта перадусім СУ-ПАДЗЕНЬНЕ (пагоркаў і лагчынаў, дадала мая іранічная сяброўка)

Красуня-брунэтка з выдатнымі формамі, ад якой мурашкі ў тваім целе бягуць проста пад пах, а тараканы ў галаве чыняць сабе сьмерць. І раптам аб'ект заглядзеньня і хаценьня пачынае крычаць на 5-6-гадовага хлопчыка, магчыма сына. Крычыць люта, торгаючы мальца за каўнер. І ўсё: куды падзелася мая пажада, хоць і похаць? І значыцца, усё ж такі мой член і маё сэрца маюць нейкую дамову аб супрацоўніцтве?.. І гэта суцяшае.  :)

Як я магу казаць, што ведаю сам сябе, калі ня маю магчымасьці ўбачыць сябе са сьпіны? Калі ня ўмею прасьвідраваць сябе ззаду сталёвым позіркам аптычнага прыцэлу і адначасова адчуць ледзяных мурашоў у хрыбціне. Ці зялёнымі вачыма той, якая страляе мне ў патыліцу: "Ты іспортіл всю мою жізнь!"
Мне прыкра, што я ня маю свайго "інша-Я", свайго дыстанцыйнага альтэр-эга, пасьлядоўніка, які заўжды глядзіць мне наўздагон...
Вось і ўчора. Знаёмая дзяўчына падыходзіць і ціхенька на вушка: "Зьміць, у цябе дзіркі на локцях..." І - пасьміхаецца. "Так трэба...", - кажу. Дома паглядзеў - сапраўды, на левым локце швэдра - маленькая дзірка... Як знак. Знак чаго? Але пабачылі яго толькі чужыя. Цыраваць ня буду. Дый ня ўмею... :) 

Гляджу на цела, якое мае быць мною...
Калі б, барані Божа, я знаходзіўся ў вышуку, дык беларускім шэрлакам няма б было за што  зачапіцца.
Тым ня менш. Калі вы бачыце перад сабой чалавека цела, на мезенцы правай рукі якога цьмее радзімка ў форме крыжыка (на згіне паміж першай і другой фалангай) -- гэта я ці тое той, хто раней быў мною. Плюс тры шнары. Над левым вокам (войска), пад правым вокам (камянюка ад аднаклясьніцы, 1980 г.) і на самай на хрыбетніцы (мяне добра адкалашмацілі  ў 1992 годзе вясковыя хлопцы пад Дзяржынскам, узброеныя зубчастымі ланцугамі ад бензапілаў, нарываўся я ў маладосьці... пазваночнік не пашкодзілі, дзякуй богу, але шнар - на ўсё жыцьцё).
Ёсьць яшчэ адна асаблівая прыкмета на гэтым целе, якое ўжо шмат гадоў называюць маім імем, але яна вельмі інтымная;), таму хай застаецца таямніцай. 
А па чым можна распазнаць вас?.. :)