z_dyht

Айцец Браніслаў учора на нядзельнай імшы ў Барбары: "Ня бойцеся, ня бойцеся заставацца ў цішыні..."
Каб адчуць, як ціха прамаўляе да цябе Дух Сьвяты...
А ў сэрцы няма цішыні. Няма й вакол сэрца.
Прачнуўся ад несусьветнага гармідару - трактары, экскаватары, начальнікі. Асфальтуюць, руйнуюць, раўнаюць - дыктатура парадку ў дзеяньні. На стадыёне ўжо падрыхтаваная пляцоўка для шрубалёта. Галоўны верталётчык краіны будзе мець мяккую пасадку...
А пазаўчора ўраніцу ластаўка ў вакно заляцела. Праверыла, ці жывы тут хто... Зрабіць з свайго пакою прытулак для птушак. Абсадзіць сьцены гнёздамі і жыць так, у цішыні, бы птушаня...
"І зьненавідзеў жыцьцё я: бо апрыклі мне ўсе ўчынкі, якія пад сонцам зьдзяйсьняюцца; бо ўсё - пустая марнасьць і пагоня за ветрам..." (Эклезіяст, 2.17)

- Заўсёды ёсьць такія цецерукі, якія не такуюць - "маўчуны" мы іх называем. Дык  вось менавіта іх і трэба адстрэльваць, бо ўсё адно ніякай карысьці гэтыя мармылі не прыносяць. Ну калі якая касачыха патрапіцца, дык, можа, яны што зь ёй і зробяць, а калі не , дык да канца маўчаць будуць. Пеўняў-маўчуноў заўжды адстрэльваюць.
- Хочаце сказаць, што гэта універсальны закон?
- А хіба не? І ў людзей так сама. Выжываюць вось такія прыгажуны як мы з табой (сьмяецца).
- Сумняюся... (праціраю акуляры:)
(З маёй сёньняшняй размовы з адным паляўнічым, былым ментом, дарэчы)

зы: Сьвет - суцэльнае такавішча. ёпт.

Евуська па дарозе "на акрабатыку": "Тата, а ў цябе жыве дома бусел?" - "Не, - кажу, - ты ж ведаеш. Чаму пытаешся?" - "Ну проста так - каб пасьмяцца..." Пасьмяяліся :)
А я падумаў: кожная жанчына, рана ці позна, выяўляе сябе заўзятым арнітолагам, прынамсі ў дачыненьні да чаплепадобных з даўгой чырвонай дзюбай:). І ці ж гэта не натуральна - спытаць у мужчыны, а ці жыве ў ягоным доме бацян? :)))
Гэх, бацяны! Пэўна, ужо зьляцелі з Сінявокай?..
Так іх во ў нас называюць: http://www.slounik.org/160240.html

ЗЫ: на фотцы бусел з-пад Відзаў-Лаўчынскіх (Браслаўшчына)